《可能喺某啲Agency眼中，我哋呢啲寫字嘅真係狗都不如》
事緣14號晚上（上星期二），有間Agency搵我幫手寫一條一分半鐘嘅廣告劇本，要求係兩日後嘅晚上要交。我開咗平時寫一條稿嘅Quote，冇因爲咁趕而坐地起價。
Agency過咗陣打嚟話可以合作，不過就話呢個價錢有啲貴，但見係第一次合作，就唔壓你價啦，但下次就冇㗎喇。
雖然明明呢個價錢係合理範圍，不過可能佢哋Budget真係比較緊，所以我都冇講多餘說話，專心聽Briefing。
然後佢就Brief咗條片要Sell咩Product、有咩Tagline，甚至連劇情框架都大致定好埋，講明個客係想Soft啲，行溫情路線，唔使太Hard Sell件產品。
去到星期四中午我交稿，晚上得到嘅Comment真係令我黑人問號。
首先佢WhatsApp我，大致係話份稿太Soft，個Product佔得唔夠多。然後佢再打電話嚟，喺電話度劈頭就話：
「喺畀Comment之前，我想講返點解我會搵你。因為我女朋友好鍾意你嘅文章，所以當你開價嘅時候，啲同事都覺得太貴，我哋平時呢啲Job都係畀開3000左右，但我力排眾議幫你爭取，所以最後冇壓到你價。但係睇到你份稿，我哋全部同事，加埋我畀咗個作家朋友睇，佢哋都覺得你係交行貨。」
我答佢：「其實我一向啲Job都係類近呢個價，我相信呢個價錢絕對唔係一個獅子開大口嘅天文數字，所以嗰晚你口頭Confirm同而家都一再強調話個價高，我覺得有啲奇怪。另一方面，我諗你都知道你哋唔單止時間好趕，前日搵我，今晚就要，而且已經定咗一個好明確嘅框架，我係完全按你哋要求同Brief去寫，所以我撫心自問係唔存在交行貨應付你哋嘅情況。
另外，本來你Brief我時有話想Soft啲，唔好咁Hard Sell，但係而家又話想要多啲Product Shot同啲硬性資訊，我可以改，但擔心會突兀。」
當中仲有幾項奇怪嘅Comment，例如：
佢：「場景同場景之間冇連接，你寫劇本時要考慮埋場景點轉換㗎嘛，唔通一幕完咗，畫面變黑色，然後再跳下一幕咁？」
我汗顏⋯⋯先唔理佢態度問題，一來明明劇情上有連接，唔使下下寫到一個景接住一個景嚟「撚鏡」，二來鏡頭調度某程度上係導演嘅工作，如果唔影響劇情發展，一般編劇都唔需要「踩過界」去寫明要點拍。
仲有其他Comment，不過因為講出嚟會透露咗個Client同件Product，避免影響客戶，甚至令我惹上官非，所以請見諒我唔可以詳述。
8:00通過電話，Agency要求當晚11:30就有第二稿。於是我馬上重寫，將第一稿完全刪走，寫過第二個完全不同嘅版本畀佢，並準時交稿。
今次份稿順利交到客户手中。我當然預咗客人會要求增刪，但有啲位置我覺得咁改或硬套資料入去有啲唔妥，但我陳述咗意見後，大家都堅持要改，我就再按要求來回改咗四次，原本話要Soft Sell嘅溫情片，變咗Hard Sell廣告雜誌。
我都有反省可能我寫作功力唔夠，又或者遊說技巧不高，呢方面唔可以怪晒人哋，但我寫呢篇文嘅重點嚟喇。
拉鋸咗接近一星期（冇錯，一星期內已經寫咗兩份劇本，另加改寫四次），喺21號（噚日），Agency話想要我同導演晚上Con Call，講解下個劇本點解咁構思，原意係點之類。雖然我覺得一條一分半鐘嘅片，照佢哋嘅框架同Core Message去寫，仲加咗好多Product / Brand Name Shot落去，其實都已經唔算係我嘅創作，冇乜討論空間，但可能導演係一個認真嘅人，想做好件事，所以我都話OK。
結果去到約定時間，我坐低咗開埋份劇本，等佢哋打嚟，但Agent WhatsApp我話導演唔得閒，今晚唔傾住。
可能Agent認為導演嘅時間比我嘅時間珍貴，所以可以臨時改期，但我都假設真係有突發情況，所以唔緊要啦，但Agent又話而家要將劇本Cut一個30秒嘅版本出嚟，問我點做。
一般而言，不論係劇本、剪片，甚至Design都好，如果當初冇講好要做多個版本，咁樣算係另一單Job，但為咗好嚟好去，我都寫咗一個大致做法畀佢，逐場逐場講邊個位留邊個位Cut。但Agent收到之後話，希望我可以再畀一份劇本佢。
經過連日嚟嘅多番交涉同不禮貌對待，我就決定要同佢哋講清楚：
「因為當初傾好只係做一個一分半鐘嘅劇本，相信你都知道中間來回咗好多次，但我明白大家都係想做好件事所以盡力配合。而30秒版本已經實在超出咗工作內容，如果你哋真係需要另一個劇本的話，就要再另外報價。謝謝。」
一個鐘後，Agent態度輕浮地回覆：
「咁樣呀
改左好多次你指4次？」
其實我真係好難受，難受嘅唔止係我一直都盡量保持禮貌，清楚交代想法，因為我知大家都係打份工，係想合作做好件事，但對方再三以惡劣態度好似上司一樣嘅氣燄去對待我。更難受嘅係佢甚至暗示覺得寫幾隻字係好容易，點解你要咁計較？
我提醒自己唔可以口出惡言，同佢講埋最後一次道理：
「係呀，不過如果你冷靜啲數清楚係五次，但都唔緊要嘅，因為係講緊嗰個30秒嘅Version由始至終都唔喺工作範圍內。」
原來唔止涉世未深嘅學生覺得Designer唔應該收錢，連Agency都覺得寫字嘅唔值得畀錢。
我知我今次講咗出嚟有機會嚇怕咗其他Agency，可能從此一單Job都冇，但我有手有腳可以去返工，冇咗呢度嘅額外收入我都仲生存到，未至於要為溫飽而苦惱。
我唔打算開間Agency個名，一嚟可能其實間公司係正常，只係嗰位同事個人嘅問題；二嚟我唔係要網絡公審，只係想大家明白，文字當然有價，而學識尊重，我相信係無價。
P.S. 如果文中同事睇到呢度，我相信我嗰Part嘅工作已經全部完成，不過呢份劇本嘅錢我唔收喇，免得好似得了便宜又賣乖，幾千蚊買個教訓買份骨氣，我諗我仲買得起。
Search